معرفة الرجال تجاره

انا والكمبيوتر أصحاب من زمان درسته وانا صغير وصار بيني وبين الوورد علاقة حميمية ما يردلي طلب ان قلت احذف قال وبكل ادب هل تريد حق حذف ذالك ومايحذف لين اقوله نعم ثم حذف وان قلت احفظ قال ودك احفظه مع الصور ولا احطه لك لحاله ثم حفظ وما يقصر معي طبعا البوربوينت هو من جماعته ويقربله وموصيه علي احط الصوره فيه ثم قال اذا تبيني اصغرها ولا اكبرها ترا انا حاضر وان بغيت تحركها ماعندي مانع



وعنده ولد عم ما اطيقه اسمه الاكسل وسبحان الله القلوب عند بعضها هو ما يواطني وما عمره خدمني في شي وانا ان مريته مريته مسرع ولاكسل له اخو من الام اسمه اكسس وهذا مثل اخوه ما ارتاح له بس الحقيقه عندهم ولد خال اسمه اوت لوك هذا ان بغيت ارسله مايقول لا وما يعرف الا تم


اضغط ارسال ثم قال تم احس انه ذيب وسنافي


وفي الحقيقه علاقتي مع ها العايله عايلة ماكرو سوفت اوفس خادمتني كثير


وانا اقول لو عندنا في الدواير والوزارات موضفين مثل اعيال ميكرو سوفت


اذا طلبت شي قالو ابشر ما يقولون اقغد انتظر اسراك وذا جا دورك قال تعال بكره واذا جيت بكره قال امسك سرا ويا طولك يا ها السرا


تعقدنا وصار عندنا عقدة امسك سرا


واذا توفقت ووصلت للموضف قال اوراقك ناقصه رح صور ورح اطبع


وبعد تعب ومراجعات ومعانات ومواعيد روح وتعال ما تطلع بنتيجه


اذا ماعندك واسطه وانا صغير اسمع معرفة الرجال تجاره اما الحين معرفة موضف الوزاره تجاره معرفة واحد في الجوازات كنز ولو عندك واحد في المرور على الكمبيوتر يا سلام مخالفاتك ومخالفات الي تعرف محذوفه


الحقيقه انا اكتب على صفحة صديقي الوورد بيض الله جميع اوراقه


وبعد ما خلصت ها المدونه قلتله احذف غير صالحه لنشر قال على الطلاق ما احذفها لازم تنزلها واستحيت منه ونزلتها